Porter’s Five Forces – 殯儀業

昨日和林sir到紅磡辦白事，途中談起殯儀業，一向無乜大事發生，最少無傳出收唔到尾數條屍留左響碼頭之類的事件。（領錯屍的不算，因為那是公務員出的錯。）我覺得好神奇，因為呢類生意，無番客，口碑又唔係咁重要，你做衰左，唔係太過份的話客人又唔會知，應該會滋生好多不良份子才對，君不見香港的旅遊業之良莠不齊嗎？可是，殯儀業又一路已來好好地，從業員又好多都好守規則，奇怪。

行下行下，唔知點解會諗到用five forces去分析呢個問題：

• Power of Suppliers: Low – ｄ紙札公仔呀，花牌呀，香港已經咁多人做，番大陸仲可以搵到無限咁多人識做，suppliers應該無乜bargaining power。係ｄ棺材難搞ｄ，不過我尋日眼見大部份公司都自己做埋棺木生意，vertically integrate左，所以都唔駛諗bargaining power 了。
• Power of Buyers: Low – 你有親人死左，都唔會有心機逐間shop去架價，更加唔會同你講價，邊度會有power?
• Threat of Rivalry: Medium to Low
  • 雖然好多人做殯儀生意，但係我實地視察又唔似好over-capacity。（但係要搵下資料先證實到），最少ｄ賣花牌叔叔唔駛好似地產經紀咁去ｄ高速公路度截車搶生意了
  • 香港人口老化，老人家多左，ｄ人又唔駛養細路，應該會肯花多ｄ錢去幫先人買個靚花牌同買副靚棺材。個market growth應該唔錯。
  • 個個都係賣ｄ咁嘅野同比ｄ差唔多嘅服務，個個ｄ價錢又差唔多，咁應該prove到個competition唔係好激烈了。因為如果真係有keen competition，一早就會有price war，同應該會有人發明到新product同新服務黎搶生意了。
• Threat of substitution: Low – 殯儀業應該唔會有替代品的。你唔會就咁燒左你親人條屍然後撒ｄ骨灰落海掛？況且咁做係犯法的。
• Threat of new entrants: Low – 我昨日和幫我們搞白事的C先生傾過，基本上入殯儀呢行，一定要靠關係的。而且，個人一定要"正" – 即係無乜不良嗜好咁解。無乜不良嗜好香港人已經買少見少了，仲要同行內人有關係的就更加係稀有動物。入行嘅新人都咁難搵，老闆要入場就更難了，點會咁容易有new entrance呢?

咁睇法，香港殯儀業應該係勁好賺的行業，你如果要轉行的話，可以考慮一下。

響呢行入面競爭唔大，加上從業員之間的關係密切，而且佢地又非常咁傳統，難怪大家都會好守遊戲規則。

心情不佳時，會胡思亂想。沒有這些無謂的事佔著思緒，令人懷念的情景就會在腦海出現了。

P.S. Michael Porter的Five Forces Model乃行業分析之利器，Marketer必修之科目。詳情請自行於google中尋找，不贅。