又發作。

三十而立。是不是三十歲的人就會想轉變的呢?

一直覺得自己入了一個夕陽工業，IT本身不是高科技，是人力密集的工業，本質上跟起樓差不多。照樣投射到IT業內的我，只是地盤裡的一個小工頭。再者，在香港建起樓，起樓工人一定要在香港；在香港寫program，寫program人可以在印度。印度人收你三份之一人工，技術比你班香港畢業的死o靚仔好幾皮，態度仲要好好多。看過The world is flat，寫program做development的人，都應該要知道世界另一邊有一大班人對你的薪水虎視眈眈。

考慮自己的能力和興趣，我可以選擇的不多。一呢，繼續做IT，一直升上去做管理層，希望自己份工在退休之前不會被外判至印度；二是轉行。天時地利，在香港這地方，有地利的一定不是IT；不想轉去做物流，因為W做物流，不想把蛋放在同一個籃。似乎轉去做金融做銀行岩啲。三呢，創業囉。沒本錢，只有搞innovation有一線生機，可是在香港做innovation，吃力不討好。

我下一步應該怎樣走呢？面對前路茫茫，我要100%紅色。太陽火辣辣的紅色，充滿能量的紅色。

我說的死心，不是比女飛那種死心，是柔道裡的死心。

比賽時，一真想著要出那一招，因為那一招我練得最多威力最強，因為我對我的那一招最有信心，因為那一招是我的必殺技。這種心理狀態叫「死心」。

你自覺你三七面最靚，每次影相也三七面，又或者張張相都「Do」咀高抄做V字，你唔悶睇相果個都悶。其實你正面都ok靚，背影可能好性感，你無試過咁影所以唔知。

柔道比賽中，你的對手不是一碌木，他有腦有手有腳，他知道你一定會出那一招，有了防備，要避開化解就容易得多。其實，可能你用其他招數，懂變通，只要do the right thing in right time，效用會更大。因為你的死心，看不到這個可能性，要贏就難得多了。

當然，你面對住一個厲害的對手，在打一場重要的比場，你很緊張，要做到不死心就難了。因為，當恐懼支配了你，你還可以想其他東西嗎? 通常你只會做你最習慣做的，心就死了。

心死了，做事死咕咕，未打都已經輸了一半。柔道如是工作如是生活如是。

公司厠所你日日都有去，你又有無試過以下經歷呢?（當中有屎屎尿尿，或會令人不安）

• 大解完畢後拿厠紙，那知換厠紙的伯伯安裝不善，一扯，整卷厠紙跌落地，仲從厠格下面的空隙轆左出去。果次好彩自己有帶紙巾，不然就咁被困厠所。
• 坐厠螺絲鬆脫，一坐落去，幾乎反艇。
• 坐厠被不知名同事用踎厠方法用完，屎花四濺，彈到出晒界。從彈出來的痕跡可見，那名同事大解得十分澎湃。第二天清潔工人，一邊講粗口，一邊用了半小時清潔完之後，這個坐厠才可再用。
• 在厠所遇見高層，被問及工作進度。兩個人在臭味之中傾了十分鐘。
• 厠所溝渠塞了，穢物反湧，厠所水浸，臭水沖出走廊，成間公司臭晒。
• 好多野諗時去厠所，在沉思中行錯左入女厠，好彩裡面無人。
• 公司七時正關冷氣，關冷氣後厠所會特別臭。所以我會盡量七點前去厠所，就算唔係好急都會去定先。
• （只限男厠）去尿兜小便時發覺去水位塞了，我一邊小便，尿兜水位一邊上涱。而我當時勢不可擋，不能自拔，只可觀望著水位上涱的速度，希望在尿兜氾濫前完事離開。

馬友友演繹Piazzola的Libertango

番工趕時間時呢首歌最岩聽，因為節奏強勁配合趕番工的步伐，而其中淡淡的憂愁亦好切合將要番工的心情。仲有馬友友支Cello真係么心么肺，和其他樂器一方面好像很配合，但另一方面又像戰鬥，又像掙扎，就好似我番到office對住啲同事o既人事糾紛一樣，夠晒undercurrent。

仲有MV入面的深戈片段，型到爆，點頂?

昨晚老父老母老遠跑到旺角為我送禮，我們一行人去了吃日本餐。

席中老母說起她有一名下屬，當正自己是老闆，向同事們呼呼喝喝。甚至連我老母也被他冷言冷語。老母這老江湖當然不動聲色地行動，向那名下屬施壓，最後那名下屬受不了壓力辭職了。

從老母口中得知，那名下屬在之前的公司二十多年，與他的上司不和，一直被欺壓，可說有點鬱鬱不得志。直至轉到老母的公司，得到老母上任的提攜和信任，老母的上任又把大權下放，那下屬便順理成章掌握大權。幾年後老母接任，大概他太習慣當老闆，忘記了怎樣當個好下屬，於是便落得如施下場。

權力是兩面刃，能使我們上進，也能使人迷失。像飲酒一樣，淺酌很樂，酗酒就有害了；太久沒飲酒，喝少許也會醉。眾人皆醉，我也只能祈求我老母現時美酒當前也不會喝得太醉了。

你有無比你上司用以下，或者類似的理由”丙”過呢?

1. 你做呢樣野之前有無問過我架？依家你係上司定我係上司？出左事隻鑊你咩呀？抑或你立心不良想比鑊我咩呀？
2. 做乜呢d小事都黎問我？你用下腦用下common sense得唔得？你做野唔用腦，淨係識做，同新界隻牛有乜分別呀？呀，有，你會收我人工，隻牛唔會囉！你自己死出去搞掂佢之後再同我講！

我地呢 d 做細o既，幾時要上表，幾時自己搞掂算數，真係一門藝術黎架！我有個同事，佢做事勤奮，兼且非常仔細，甚少出錯。但是佢每日都會email 比上司, 說明佢今日做過的每一件事; 而且, 任何決定都一定會得到上司批准才開工。如果你係佢上司，你會對佢有乜野評價呢？話佢懶又唔係，話佢蠢又唔係，但係佢日日咁email 轟炸你, 你唔煩就奇了。佢咁勤力，你炒佢又炒唔落手，但係你一定唔會升佢囉。

你上司都係人，人人口味都唔同。有d人鐘意你乜都話佢知，有d人淨係想你搞掂晒先話個結果比佢知；有d人只喜歡聽好消息，有d人就好壞消息都會聽。

當然，我唔係提倡你做個淨係識”見人講人話，見鬼講鬼話”o既擦鞋仔。但係，你最少要知道，你老闆會expect點樣同你溝通。

例如，如果佢expect個溝通模式係，佢比d high level o既意見你，跟住就預左你搞掂左先會report番比佢知。響呢d情況下，你就唔好事無大小都走去滙報了。因為佢只係會expect件事就完成之前，你只會搵佢兩三次。所以，你就要好好利用呢兩三個quota去問一d重要o既問題啦。如果你一開始係咁問佢d芝麻綠豆小事，爆晒quota，佢會開始ignore你D email，甚至會唔聽你電話。咁到時有大事發生，你搵唔到老闆做決定，咁件事點做先？果時你就大鑊了。

所以呢，做下屬o既，每逢有新上司到任，就算你不屑趕去擦第一手鞋，你都要主動咁觀察你個新上司，尤其是佢個溝通模式。咁你之後同佢溝通時遷就一下，和他共事時便會事半功倍了。

你可能會問，點解要你就佢？咁佢就我得唔得？

仲要問點解？因為佢係你老闆囉！